कविता

रस्ते

उभे आडवे वेडे वाकडे
इकडे तिकडे चोहीकडे
कधी दगडांचे कधी मातीचे
कधी गवतांचे पायघडे!

कुणा जोडती कुणा मिळविती
कधी जुळविती दो ह्रदये
कधी मोडिती आणि तोडिती
कधी ह्रदयांची हो शकले

पुरे जाहले या रस्त्यांवर
दूरदूर ते चालचालणे
कधी भेटीचे कधी विरहाचे
जीवनातले आर्त तराणे!

दूर क्षितिजावरी खुणविते
तेजस्वी ती शुक्रचांदणी
घेऊनीया हातात हाती
चल जाऊया दूर साजणी!

Shashank Purandare 06/04/2023